New Brunswick فكرة الهجرة - بدايتي مع

السلام لأحلى صحبة وأجمل ناس ✋

هنا أنا هتكلم ازاي جت فكرة الهجرة وازاي بدأت وازاي اتحولت الفكرة الى هدف.

في أواخر شتاء 2013 كنا قاعدين مع بعض الاصدقاء اللي كانوا مقتنعين جداً ان الهجرة عموما لازم تكون غير شرعية وان الهجرة لكندا بالذات صعبه جدا ومحتاجه فلوس كتير –  يوميها قعدو يكلموني كتير عن الهجرة، والهجرة اللى كندا على وجه الخصوص وان ازاي المهنة بتاعتي مطلوبة هناك وان ازاي البلد دي ساحرة في طبيعتها وناسها وتلجها.

وقتها لا اراديا لقيت نفسي بفكر ازاي اهاجر لكندا هجرة شرعية، بس كان مجرد تفكير مدخلش حيز التنفيذ

بعد سنه تقريبا في اواخر 2014 رجعت الفكرة تاني بقوة خصوصاً أن الأوضاع كانت بتزداد سوءاً في مصر ودول الخليج كمان، بس  كان لازم نستنى لأن نظام الهجرة الكندي وقتها كان هيتغير في يناير 2015 لنظام جديد اسمه الاكسبرس انتري بعد ما كان النظام المتبع هو ورقي فيدرالي.

وقتها مكنش في غير منتدى المطاريد كمرجع لأنه اكتر مكان بيشرح النظام الجديد ووقتها كان أغلب الموضوعات عبارة عن تكهنات بس كانت مفيدة جداً، مع فتح النظام الإلكتروني الجديد بقى موضوع الهجرة أسهل في التقديم وبدأنا فعلاً نحضر أوراقنا

مجموع نقاطنا وقتها كان قليل وكان لازم ندور على ترشيح مقاطعة أو عقد عمل الي كان مستحيل الحصول عليهم.

أغلب شروط المقاطعات الكبيرة زي اونتاريو، ألبرتا وبريتش كولومبيا صعبة وبتطلب دراسة في كندا أو معارف داخل المقاطعة وده مكنش متوافر عندنا -  نقلنا البحث للمقاطعات الصغيرة وكانت نوفاسكوتشيا "Nova Scotia" هي الإختيار، وقتها تواصلنا مع محامية هجرة داخل كندا عرفناها عن طريق صديق ومع إن تكاليفها كانت عالية إلا إنها كانت خيار مناسب وقتها،  وبدأنا في منتصف 2015 بالتحضير لإمتحان اللغة الانجليزية  (IELTS) – لان حضرتك عشان تقدر تفتح ملف على موقع الهجرة “CIC” لازم تكون محقق الحد الادنى في امتحان اللغة واللي هي 6 في اربع امتحانات (المحادثة – الكتابة – القراءة - الاستماع) وطبعاً كل ما درجاتك تعلى كل ما نقاطك تعلى اكتر وبالتالي موقفك في انك تترشح للهجرة يبقى أقوى – أن شاء الله هيكون فيه مقالة تانية تفصيلية عن امتحان اللغة وازاي تذاكر والمواقع اللي ممكن تفيدك وكل ده بدراسة ذاتية ودون الحاجه الى أي كورسات.

الحمد لله يوم 15 نوفمبر 2015 امتحنت وعديت وجبت السكور المطلوب وفي نفس الوقت المدام كمان امتحنت لان درجاتها مهما كانت قليلة بتاخد عليها نقاط اضافية ضمن حاجة يطلق عليها "القدرة على التأقلم"

وبعد كده الخطوة التانية بعد امتحان اللغة اني قدمت ورق تقييم شهادتي لل "WES" World Education Services  وده عبارة عن منظمة معتمدة في كل من الولايات المتحدة الأمريكية وكندا بتعبت سيادتك عليها شهادتك/شهاداتك العلمية وبيان بالدرجات وهم بيقيمو الشهادات وفقاً للنظام التعليمي في كندا ويمنحوك الدرجة العلمية المعادلة ليها.

كل ما عليك هو انك بتدخل على الموقع بتاعهم وتنشأ حساب ليك وبعدين بتطلب منه انك عايز تقيم شهاداتك وذلك لغرض الهجرة وهو بيقولك تعمل ايه بالتفصيل، كل اللي عليك انك تتبع التعليمات ومش هتلاقي اي صعوبة في الموضوع.

التكلفة تقريبا وقتها كانت على ما اذكر 240 دولار كندي تقييم شهادتي والورق والتوثيقات في الجامعة كانت في حدود 1500 جنيه مصري شاملة تكلفة ارسال الطرد. انا ساعتها مكنتش في مصر وربنا يكرمها اخت مراتي هي اللي قامت بالمهمة كلها كأني كنت موجود وأكتر.

وفي نفس الوقت بدأت اشتغل على شهادات خبرتي طبقاً للمتطلبات الكندية – ان شاء الله هبقى اعمل مقالة منفصلة خاصة بشكل شهادات الخبرة وطريقة عملها.

كل ده وانا لسه مفتحتش ملف أكسبرس إنتري لان صلاحية الملف سنه وكنت محتاج وقت أحضر الورق وكان قرار تأجيل فتح الملف لحد ما أخلص الورق قرار سليم، اخدنا حوالي 6 شهور ما بين إمتحان الأيلتس وتحضير الأوراق لحد ما في يوم الدنيا كلها اتغيرت تماما.

البداية الفعليه:

كنت لسه راجع من إجازتي السنوية في مصر مكملتش يومين، لقيت بوست في جروب على الفيسبوك اسمه الهجرة لنيوزلاندا وكندا واستراليا، البوست ده عبارة عن شخص -لا اذكر إسمه للأسف- منزعج جداااااا من المصريين كلهم لأنه حضر محاضرة لمقاطعه إسمها نيوبرونزويك في أبوظبي وكان أغلب الحضور من الهند والفلبين وأن المصريين و العرب عموما كانوا قلة، وأن لسه  المقاطعه دي هتعمل محاضرتين كمان واحدة في القاهرة وواحدة في الأسكندرية

المحاضرة دي اذا حضرتها وورقك جاهز ممكن تاخد  ITA - Invitation To Apply دعوة من المقاطعة أنك تقدم ورقك ليها عشان تديلك ترشيح تقدر تاخد بيه 600 نقطة وتدخل سحب وزارة الهجرة الكندية مباشرة

وحضور المحاضرة دي شرط من شروط التقديم للمقاطعة متقدرش تقدم للترشيح من غيره، وعشان تعرف تحضر المحاضرة دي لازم تكون مقيم شرعي في البلد المقام فيها المحاضرة أو انها بلد جنسيتك

وعشان وقتها لسه راجع من اجازتي في مصر كان الموضوع صعب اني انزل تاني،وفعلا اخدت المجازفة، وقلت هقدم لحضور محاضرة القاهرة وإذا ملقتش مكان هقدم لمحاضرة الإسكندرية، قدمت لمحاضرة القاهرة والحمد لله لقيت مكان وحجزت تذكرة طيران ليوم واحد (13 ساعة بالظبط).

التحدي بقى وقتها اننا نحاول نعرف المقاطعة دي لاننا تقريبا كانت اول مرة نسمع عنها، دخلنا على خريطة كندا تاني لقيت إنها قريب جدا من نوفاسكوتشيا “Nova Scotia”على حدودها تقريبا وانها من ضمن مقاطعات الأطلنطي، والخطوة التانية اني افتح ملف اكسبرس انتري.

  

يوم المحاضرة:

راحت عليا نومه وصحيت متأخر، والحمد لله إني كنت محضر أوراقي من بليل  جريت على المطار والحمد لله لحقت الطيارة.

 المحاضرة  كانت في فندق راديسون بلو - القاهرة جنب المطار، وصلت الحمد لله في معادي وكانو بياخدو اسامينا على بوابة القاعة وكان المشرف على المحاضرة ورئيس البعثة في مصر هو أستاذ أشرف غانم وكانت المحاضرة تعريفية عن المقاطعة وكل ما يخصها من نظام تعليم  ونظام صحي ووظايف وغيرها وبعد المحاضرة بدأوا يستقبلوا الاوراق ويسلموا المتقدمين دعوة التقديم للمقاطعه.

والناس الي جت وورقها مكنش جاهز تم اعطائهم إثبات انهم قد قامو بحضور المحاضرة وبمجرد قيامهم بتجهيز الأوراق المطلوبة ما عليهم الا ان يرسلو الى المقاطعة وهم هيدوهم Invitation to Apply  على طول ومن غير أي طلبات تانية.

طلبت منهم اني اقدم ورقي في الأول لان عندي طيارة لازم الحقها، وكانوا متعاونين جدا وبعد ما قدمت الورق ونزلت من الفندق اكتشفت اني كاتب النوك الخاص بالوظيفة بتاعتي في الورق غلط 🙉، اضطريت ارجع عشان اصححه وللمرة الثانية كانوا اكثر من متعاونين وسهلوا عليا الموضوع جداً ومشيت عشان الحق الطيارة – شكر خاص لكل الناس اللي كانو في المحاضرة دي لأنهم وقتها تفهمو موقفي وسمحولي اتجاوزهم عشان الحق طيارتي.

اكتر كلمة مش قادر انساها لما كنت بقدم الورق للسيد اشرف غانم وراجع معايا كل حاجه سلم عليا وانا ماشي وقالي:

 
"See you in Brunswick"