رخصة القيادة الكندية

السلام على أحلى صحبة وأجمل ناس ✋

النهاردة ان شاء الله هنكلم عن رخصة القيادة في كندا وبالتحديد في مقاطعة نيوبرونزويك (وزي ما وضحت قبل كده في اختلاف بين المقاطعات ولكن الاختلاف طفيف جداً واللي ممكن يتمثل في اختلاف قيمة الرسوم وبعض الاجراءات الفرعية).

رخصة القيادة في برونزويك بتختلف بكون الشخص الطالب الحصول عليها مبتدئ في القيادة (ودي بتنطبق على المقيم داخل كندا وحديث الوصول كمان) والنوع التاني انك حديث وصول ولكن معاك خبرة سابقة في القيادة. هنكلم في كل نوع على حده من حيث اجراءات التقديم، الرسوم، والمستندات المطلوبة.

قبل ما ندخل في الخطوات والتفاصيل يا ريت نبص على اللينك ده واللي بيشرح كيفية الحصول على الرخصة الكندية والقيادة في كندا، دائماً بيكون من الافضل نرجع للحكومة الكندية كمصدر اساسي وموثق للمعلومات.

طيب ايه أكتر الاسئلة الشائعة واللي بتخطر على بالنا لما بنفكر في الحصول على الرخصة الكندية:

1- هل انا محتاج يكون معايا رخصة قيادة دولية؟
في الحقيقة أنت مش بتحتاج رخصة دولية عشان تسوق في الفترة الاولى ليك من ساعة الوصول، كل اللي بتحتاجه هي الرخصة بتاعتك سواء المصرية أو الخليجية أو أي كانت هي أيه وتكون طبعاً مترجمة للانجليزية أو الفرنسية من مكتب ترجمة معتمد. الفترة اللي بتقدر تسوق بيها برخصتك المترجمة دي بتتراوح من 3-6 شهور وفترة ال3 شهور الاولى دي بتكون كافية جداً انك تكون قدمت واخدت الرخصة المبدئية - تفاصيل أكتر هتلاقيها في اللينك اللي فوق 👆. 

2- هل انا محتاج الى شهادة من شركة الـتأمين اللي كنت بتعامل معاها في البلد الأم أو بلد الأقامة؟
اختلفت الأقاويل في الموضوع ده ناس قالت انها ملهاش لازمة ومش بتفيد خالص اثناء حصولك على التأمين لما تجيب عربية أن شاء الله وناس تانية قالت انها مهمة وبتنزل مبلغ محترم من التأمين قد يتراوح من 50 - 150 دولار كندي🙈 وده طبعاً مبلغ محترم. يبقى النصيحة هنا اذا عرفت تجيب الروقة دي من شركة التأمين وتترجمها أكيد مش هتخسر وان شاء الله تتقبل من شركة التأمين في كندا وتحصل على التخفيض.

3- هل محتاج لشهادة بعدد سنوات الخبرة في القيادة؟
دي طبعاً مهمة جداً وخاصةً للرخص اللي مش بيكون مكتوب عليها انت بقالك كم سنة بتسوق، في الحالة دي بتروح حضرتك للمرور اللي انت تابع ليه وتطلب منهم شهادة بعدد سنوات الخبرة القيادية اللي حضرتك قضيتها وبعدين تطلع على نفس مكتب الترجمة هو هو وتترجم الشهادة دي للانجليزية أو الفرنسية.

4- هل انا محتاج اخد دروس في مدرسة سواقة؟
أه محتاج مش عشان انت محتاج تقوي مهارة السواقة عندك، ولا عشان انت معندكش خبرة في الشوارع الكندية وطرق القيادة والتعليمات المرورية اللي متعودناش عليها في بلدنا، أنت ببساطة محتاج تاخد دروس السواقة دي لأنها هتوفر معاك توفير جبار في التأمين قد يصل الى 100 دولار كندي شهرياً، يعني بحسبة بسيطة انت تقريباً هتتكلف من 500-600 دولار كندي مصاريف المدرسة و100 دولار كندي مواصلات يعني ممكن نقول 700 دولار كندي قصاد 1200 دولار كندي يعني في توفير في السنة الأولى حوالي 500 دولار كندي - أعتقد الموضوع مستاهل - وفي الاخر انت صاحب القرار.

نيجي بقى دلوقتي لخطوات الحصول على الرخصة وهنا انا بتكلم بوجه الخصوص على مقاطعة نيوبرونزويك - وزي ما وضحت في البداية ان الاختلاف مش كبير - ولكن وجب التنويه. 

أولاً: طلب الحصول على رخصة كمبتدئ 

• شراء كراسة القيادة من Service NB زي اللي تحت دي👇 وبتكون قيمتها 5 دولار كندي زائد الضريبة وممكن تشتريها اونلاين وتتشحنلك وفي الحالة دي بتزود 3 دولار كندي 
  

• بعد كده بتقدم حضرتك على اختبار الكتابة واللي بيكون قيمته 25 دولار كندي زائد -الضريبة شوف اللينك ده للرسوم، بمجرد ما تنجح في الاختبار ده بتحصل على 7-1رخصة قيادة (البطاقة الصفراء) أو ما يطلق عليها برخصة المبتدئين.
• رخصة القيادة 7-1 بتأهلك للقيادة ولكن بشروط

1. لازم يكون قاعد جنبك حد معاه رخصة قيادة الخامسة
2. غير مسموح بالقيادة من الساعة 12 صباحاً وحتى الخامسة صباحاً حتى في جود شخص يحمل الرخصة الخامسة بجوارك
3. لازم تحول رخصة 1-7 الى 2-7 وده بعد اجتيازك لاختبار قيادة على الطريق واللي بتكون تكلفته في حدود 90 دولار كندي غير شامل الضريبة

• بعد حصولك على رخصة 1-7 بتقدم على مدرسة قيادة وبتكون في حدود 4 حصص (حصة كل اسبوع/يوم كامل) وهم بيساعدوك تحول لل 2-7 ده غير الاستفادة اللي بتحصل عليها في التأمين على عربيتك زي ما شرحنا فوق. 

بمجرد حصولك على الرخصة 2-7 فأنت بتقدر تسوق زيك زي صاحب رخصة القيادة الخامسة  باستثناء واحد بس وهو عدد الركاب - حيث أنه بالنسبة لل 2-7 عدد الركاب بيكون 2 فقط السائق + مرافق جنبه، أما بالنسبة للرخصة الخامية فعدد الركاب مفتوح.

ثانياً: طلب الحصول على رخصة بخبرة قيادة سابقة

• شراء كراسة القيادة من Service NB زي بالظبط ما عملنا في المبتدئين.
• بتقدم على الاختبار الكتابي وبتحصل على 1-7 رخصة قيادة (البطاقة الصفراء)
• في حالة السائق اللي ليه خبرة سابقة مش بيطلعلو رخصة قيادة زي ما شفنا في المبتدئ ، اللي بيحصل بيطلعو ورقة صفرا صالحة لمدة 6 شهور يقدم خلالها على اختبار قيادة على الطريق
•  بمجرد نجاحك في اختبار الطريق بتحصل على رخصة القيادة الخامسة.
• طبعاً قبل ما تعمل اختبار الطريق لازم تتمرن كويس اما عن طريق مدرسة (اوصي بها بشدة) أو عن طريق التدرب مع احد الاصدقاء الحاصلين على الرخصة الخامسة.

ملاحظات تهمك

• لما بتيجي تقدم على الأختبار الكتابي سواء كنت مبتدئ أو ليك خبرة قيادة سابقة لازم يكون معاك اثباتين على محل اقامتك زي عقد الشقة، فاتورة الكهربا، فاتورة الانترنت.....
• بردو لما بتجي تقدم على الأختبار الكتابي لازم يبقى معاك جواز السفر + COPR + رخصة القيادة المترجمة بالاضافة طبعاً للاثباتين اللي اتكلمنا عليهم في الملحوظة الأولى.

كل التوفيق والنجاح للجميع

ودمتم في رعاية الله وحفظه ... أخوكم المهاجر 💓

CPA لغرض التقييم المطلوب لل - WES اعادة تقييم شهادة التخرج

السلام على أحلى صحبة وأجمل ناس ✋

البوست ده عشان الناس تفهم ازاي ممكن تعمل اعادة تقييم لشهادة التخرج عشان تبعتها  لتقييم CPA. انا عملتها في شكل مجموعة من الخطوات بالتسلسل كالتالي:

1- الدخول على موقع WES واختيار upgrade report:

2-  الخطوة التانية هتختار Education وبعدين من drop list هتختار graduate admission وبعدين تدوس continue: 

3- هتختار في الخطوة دي upgrade document-by-document evaluation to course-by-course وتدوس continue:

4- في الخطوة دي هيقولك انك محتاج تعمل application جديد فتضغط على start new application واللي هيفتحلك application جديد زي اللي عملته بالظبط وانت بتقيم الشهادة لل IRCC:

5- هنا طبعاً انت عندك سابق خبرة بالموضوع ده وتملا الapplication زي ما عملت قبل كده، التغيير كله هيكون لما تيجي للجزء بتاع الاستلام في الطلب هتعمل اضافة مستلم تاني لان الاولاني بينزل اوتوماتيك بعنوانك:

طبعاً بتحط عنوان CPA التابع لمقاطعتك واللي جبته من الموقع بتاعهم.

6- هتكمل الطلب عادي جداً وتدفع المصاريف المطلوبة منك وهيجيلك ايميل ياكد طلبك وهتلاقي الطلب الجديد اخد رقم جديد.

7- الخطوة دي مهمة جداً حضرتك بتبعت ايميل على العنوان ده "accauser@wes.org" تقولهم فيه انك عملت طلب جديد عشان تبعت تقييم شهادتك لل CPA وانه مطلوب منك في الطلب الجديد اللي رقمه 1234567 انك ترجع تبعت الشهادة من الجامعة ودي خطوة انت فعلاً عملتها قبل كده اثناء التقييم ل IRCC، في خلال 48 ساعة هيردو عليك ويقولولك انه هيتم استخدام التقييم اللي اتعمل قبل كده.

8- بعد كده بتفضل تتابع حالة الطلب بتاعك على الموقع بتاعهم لغاية ما يبقى APPROVE ويقولولك انه اتبعت، بعدها باسبوع بالظبط تبعت لل Advisor بتاعك عشان يأكد الاستلام.

دي كانت الخطوات اللازمة لعمل تقييم تاني لشهادتك وارسالها مباشرة الى CPA الخاص بمقاطعتك. انا مستعد اجاوب أي اسئلة أو اي استفسارات ليكم حوالين الموضوع ده، ابعتولي في تعليق عشان الكل يستفيد وان شاء الله ارد عليكم في أقرب وقت.

ودمت في رعاية الله وحفظه ... أخوكم المهاجر 💓

CPA Canada

السلام على أحلى صحبة وأجمل ناس ✋

البوست دا عشان نتكلم فيه عن شهادة المحاسب القانوني المحترف بتفاصيل أكتر. في البداية لازم تحدد اذا دراسة CPA هي اللي هتفيدك وتدعمك في مجال شغلك وانك حابب فعلا تاخد الشهادة دي لان لازم تبقى فاهم ان الشهادة مش سهلة ابداً وهي معروفة انها واحدة من أصعب الشهادات المحاسبية عالمياً ده غير انها "بلاعة" فلوس فلازم تحسبها صح 👌، انت كمحاسب لازم تكون حاسب العائد عليك من الشهادة وهتقدر تسترد تكلفتها في قد ايه. بالبلدي يعني الموضوع كله Investment case ليها ROI و PAY BACK.

وعشان تحدد كويس انت عايز تروح مع اني شهادة كندية محاسبية، يا ريت تبص على البوست ده اللي بيديك ملخص عن معظم الشهادات الكندية المرتبطة بالمحاسبة.

طيب شهادة المحاسب القانوني المحترف الكندية عبارة عن مجموعة من الخطوات لازم تتبعها عشان تسجل معاهم ويكون ليك الحق في دخول الامتحانات، وعشان أسهلها انا همشيها معاكم خطوة بخطوة بالتفصيل:

أولاً: تقييم شهاداتك وخبراتك السابقة

وهنا أول حاجة هتعملها انك هتراسل Student Recruitment Advisor التابع للمقاطعة اللي انت رايحها (يعني مثلا اذا انت رايح نيوبرونزويك بتراسل advisor التابع للمقاطعة دي)  كل اللي هتعمله هتروح على الموقع ده وتختار المقاطعة اللي انت رايحها هينقلك لصفحة CPA التابعة للمقاطعة ومنها هتاخد الايميل بتاع Advisor وتبعتله ايميل تقوله ان انت موجود في كندا أو انك هتوصل كندا قريب (وده الأفضل طبعاً) وانك عندك شغف بشهادة المحاسب القانوني المحترف وانك عايز تعرف اذا ممكن تبدأ في تخليص الاوراق من دلوقتي واذا بيحتاجو اي مستندات معينة. هيردو عليك في خلال 48 ساعة وهيقولولك انك لازم تكون موجود داخل الاراضي الكندية عشان تبدأ الدراسة بس ده ميمنعش اننا ممكن نبدأ اجراءات تقييم ملفك وهيقولولك كمان انهم هيبعتولك ايميل منفصل على الحاجات اللي عايزنها عشان يعملو التقييم.

في خلال اسبوع بيكون جايلك الايميل التاني وبيكون طالبين فيه الاتي عشان يعملو التقييم:

• تقييم لشهادة الجامعة بتاعتك من WES وارسالها بالبريد لل CPA Business School للمقاطعة اللي انت تابع ليها - طبعاً انت هتفكر انك مادام مقيم الشهادة قبل كده مع WES هيبقى كل اللي عليك انك تبعتلهم تطلب منهم يبعتو نسخة من التقرير لل CPA - الكلام ده مش مظبوط ومش هينوبك منه غير انك هتدفع 35 دولار ويرجعولك تاني بعد حوالي شهرين- الموضوع فيه شوية خطوات لازم تتبعها وهنا انا عملتلها البوست ده عشان نفضل هنا في سياق الغرض الرئيسي.
• تعبئة النموذج الخاص بالتقييم اللي على الرابط ده

• تبعت النموذج بعد ما مليته ومعاه صورة من تقييم WES (دي ممكن تجيبها من على الموقع بعد انتهاء التقييم) وتبعتهم لل Advisor
• هيجيلك ايميل من الحسابات بفاتورة عملية التقييم وبتكون قيمتها 350 دولار كندي + 15% ضريبة (وده طبعاً ينطبق على نيوبرونزويك - كل مقاطعة ليها التعريفة الخاصة بيها بس في الغالب بيكونو متقاربين).

ثانياً: متابعة طلب التقييم مع CPA

بعد ماخلصنا كل الحاجات الكتير اللي فوق دي، بتستنى من اسبوعين لتلاته واذا مجالكش منهم اي رد، ابعت لل Advisor  قوله ايه الاخبار هيرد عليك ويقولك هيشيك ويجيلك تاني، بيغيب كام يوم كده بحد أقصى اسبوع، وبعدين هيرجعلك ويقولك انهم محتاجين  منك تبعت شوية حاجات تانية بتختلف من شخص للتاني (بالنسبة ليا انا اطلب مني السيرة الذاتية وشهادة خبرة من الشغل الحالي تتبعت من قسم الموارد البشرية مباشرة لل CPA وكمان طلبو مني شهادة حسن سير وسلوك خاصة بال CMA الامريكية) وبيرجعلك بنتيجة التقييم وانك eligible للبدء في اي مرحلة من مراحل CPA. 

ثالثاً: هيكل ال CPA الكندية

ال CPA الكندية بتنقسم الى الكورس التحضيري CPA PREP والكورس الاحترافي CPA PEP، كل واحد فيهم بيبقى فيه مجموعة من المواد اللي بتزاكرها وتتمتحن فيها. البداية بتكون انك لازم تخلص وتاخد شهادة الكورس التحضيري عشان تقدر تتنقل للكورس الاحترافي ، الكورس التحضيري مواده أكتر من الاحترافي بس طبعاً اسهل،  في الغالب الكورس التحضيري بتكون مواده كالاتي: 

• Introductory Financial Accounting
• Introductory Management Accounting 
• Economics
• Statistics
• Business Law
• Information Technology

ودول يطلق عليهم Non-core courses بعد كده بيكون عندنا Core Courses ودول

• Intermediate Financial Reporting I
• Intermediate Financial Reporting II
• Advanced Financial Reporting
• Corporate Finance
• Audit and Assurance
• Taxation
• Intermediate Management Accounting
• Performance Management

الرابط ده هتلاقي فيه شرح لمحتويات ومواد الكورس التحضيري:

أما فيما يخص الكورس الاحترافي فده بينقسم الى:

1. Core Modules

2. Elective Modules

3. Capstone Modules

4. الامتحان النهائي - CFE 

الرابط ده هتلاقي فيه شرح لمحتويات ومواد الكورس الاحترافي.

المخطط التالي بيوضح مسار الشهادة من ساعة ما تبدأ CPA PREP مروراً بال CPA PEP و CFE وصولاً لعضو في CPA

 رابعاً: تكلفة ال CPA 

بالنسبة للتكلفة واللي ممكن تبقى صدمة للبعض منكم بس لو تفتكرو انا قلت ايه في بداية البوست ان الشهادة دي محتاجه مصاريف كتير بس عائدها مضمون باذن الله مش بس داخل كندا، لا وبره كمان - شهادة ليها تقديرها واحترامها في كل مكان.

انا عملت الملخص التالي لتكلفة الكورس التحضيري والاحترافي:

وزي ما قلت قبل كده التكلفة دي بتختلف من مقاطعة للتانية ومش ثابتة بس اللي أقدر اكدهولك انها مش بتفرق 10-20 دولار كندي في المجمل زيادة او نقصان من مقاطعة للتانية.

بعتذر منكم اذا كنت طولت في البوست ده بس حقيقي الموضوع كبير حبتين ومحتاج مننا بحث كتير، انا حبيت اديكم مفاتيح الخطوط هنا والباقي عليكم.

يا رب أكون قدرت أفيدكم بالبوست ده وانا موجود اذا في اي حد ليه اي استفسار، بس يا ريت رجاءاً يكون في تعليق عشان الكل يستفيد.

ان شاء الله هيكون في بوست لكل امتحان وكورس هاخدو عشان اشارك الناس التجربة، دعواتكم وبالتوفيق للجميع.

دمتم في رعاية الله وحفظه ... أخوكم المهاجر 💓

ملابس أول رحلة لكندا

السلام على أحلى صحبة وأجمل ناس ✋

موضوع مهم ومش بناخد بالنا منه الا لما تقرب موعد الرحلة ونلاقي نفسنا بنضرب اخماس في اسداس وهنعمل ايه..؟ وهنجيب منين..؟ ونشتري من هنا ولا من هناك..؟ والاسعار في رنج كام...؟ وايه المحلات اللي نجيب منها..؟ وطيب هو هنا أرخص ولا هناك أرخص...؟ وفي الاخر "بقولوكو ايه انا مش مسافر" .....😉 

الموضوع بسيط بس محتاج تعقيد .. كل الحكاية محتاجين نعرف احنا مسافرين امتى (شتاء، ربيع، صيف، أو خريف) - درجات الحرارة بتتراوح من كام لكام في التوقيت اللي احنا نازلين فيه .. 

لازم نبقى فاهمين ان كندا فيها أمطار طول السنة تقريباً وبالتالي من الحاجات الاساسية اللي هتحتاجها هي Jacket و Boot  ويكونو water proof. في الشتا هتحتاج نفس الحاجات دي بس هتكون مضاف اليها المادة العازلة عشان سيادتك تحافظ على رجلك من الصقيع. 

طيب بالنسبة لنيوبرونزويك، خلينا نشوف ايه ممكن نحتاجه اذا صادف نزولنا اي من الفصول المختلفة، اذا صادف انك نازل في الشتا (ديسمبر، يناير، وفبراير) بتحتاج تكون ملابسكم مكونة من Thermal داخلي "كلسون" وبتلبس لبسك الشتوي الطبيعي وبعدين الجاكت من فوق والبوت في رجلك. الاماكن اللي ممكن تجيب منها الحاجات دي مش زي الاماكن اللي اتعودنا عليها، فيه محلات محددة وخاصةً في بلادنا العربية. اشهرهم طبعاً هم Columbia and North Face. 
اذا انت في دبي ممكن تروح دبي مول وهتلاقي المحلات دي موجودة هناك بس اسعارهم غالية مقارنةً بالسعودية (جدة) والاونلاين. وموجود في جدة في Red Sea Mall  كمان في الدور الارضي من ناحية بوابة خمسة. الفرق بين دبي وجدة اللي لاحظته ان دبي فيها موديلات اكتر وتنوع اكتر واسعار زي ما قلنا اعلى مقارنة بجدة اللي اسعار فيها حقيقي ممتازة بس مش هتلاقي فيها كل حاجة. يعني مثلاً انا ملقتش حاجة للاولاد في كولومبيا جدة ومعرفتش ارجع تاني دبي فاشترتليهم من Amazon وعندو حاجات كويسة جداً وربنا وفقني وعرفت اتوفق في خصومات الجمعة البيضاء.

بالنسبة للولاد كل الناس نصحو بنوعية بوت تناسب جو الصقيع والمطر وفي نفس الوقت خفيفة في رجليهم ودي اللي انا اشتريتها من Amazon:

طيب ناس هتسالني نشتري بزيادة ولا لأ..؟ نصيحتي ووجهة نظري ملهاش لازمة اشتري طقم لكل فرد من أفراد اسرتك ولما تروح هناك موضوع الشراء سهل جداً واونلاين والاسعار كمان كويسة وبيوصلو لحد البيت ببلاش لما بتشتري فوق 150 دولار كندي ودي مش حاجة وانا متاكد اننا هنعدي الرقم ده خاصةً في الاول. يعني جرب ادخل كده على الموقع الكندي ل Columbia  هتلاقي كل اللي ممكن تحتاجه انت وكل افراد اسرتك اياً كانت اعمارهم ايه. طبعاً لما توصل كندا هتلاقي في اماكن كتير بتبيع اللبس ده (عشان ده لبسهم الطبيعي) ومش هتواجه الصعوبات اللي ممكن تواجهها هنا. اللي عايز اقوله شوف أقرب Columbia or north face في المدينة اللي عايش فيها وهات منه اللي متوفر واللي مش متوفر ادخل على صفحة Columbia في Amazon  في اللينك اللي فوق 👆 ونقي براحتك اللي انت عايزه.
بالنسبة لل Thermal انا شفت حاجات كتير جداً وفي في مصر كتير طبعاً منهم قطونيل كويس الى حد ما، أنما اللي انصح بيه بجد هتلاقوه في Marks & Spencer وده سعره تقريباً 85 ريال سعودي. انا عارف انه غالي خاصةُ اذا هتقارنه بالمصري بس اذا انت جسمك من النوع اللي بيبرد فده ممتاز وبيعيش.
معلش سامحوني انا بطول في الكلام عن اللبس الشتوي بس حاسس انه اكتر حاجه محتاجه مننا مجهود لاننا ببساطة مش متعودين على الجو ده وتجربة جديدة تماماً معنداش فيها اي سابق خبرة.

بالنسبة بقى للصيف في نيوبرونزويك فده بلح البلح، الناس بتنتقم من اللي بيحصل فيهم في الشتا فبتلاقيهم على طول لابسين slippers و shorts ومقضينها يا معلم، وده مؤشر اننا ناخد معانا هدومنا الصيفي العادية لأننا هنحتاجها في فصل الصيف.

يفضلنا بقى الخريف والربيع ودول من أحلى الشهور في برونزويك الجو جميل ومتوسط درجة الحرارة 8-10 درجة مئوية، يمكن تسألني جو جميل ازاي هقولك انه مع التعود ومع درجات الحرارة اللي بتعدي 30- درجة مئوية أكيد ده جو تحفة. الملابس اللي بنحتاجها في الفصلين دول زي ما الناس نصحوني هي الشتوية اللي احنا بنستخدمها هنا، يبقى بردو هتاخد معاك لبسك الشتوي زي البلوفرات والسويت شيرت انما الجاكيتس والبالطو والحاجات دي مش هتحتاجها.


الدروس المستفادة:

• متستناش لاخر لحظة عشان تجيب طقم الرحلة الأولى وابدأ اعمل بحث من دلوقتي وحط check list باللي انت محتاجه;
• هتاخد لبسك الخريفي والصيفي وجزء من الشتوي لحد ما تتعود، يبقى من باب أولى عشان الوزن اشتري طقم واحد للصقيع وخلي الباقي جيبه من هناك;
• وأنت طالع الطيارة البس أنت وافراد اسرتك اللبس الشتوي وخلي معاك كيس أو شنطة على جنب كده، لما تخلص وزن ترجع تجمع فيه الهدوم دي لانك اذا سبتها في الشنط هتضيع على نفسك تقريباً من 8-10 كيلو وانت محتاج لكل جرام;
• وانت بتشتري الجاكت في اختبار بسيط كده ممكن تعمله وهو بتحط ايدك جوا الكم وتنفخ من بره وتشوف اذا الجاكت بيمرر الهوا ولا لأ لانه اذا بيمرر الهوا يبقى مش هينفع معاك - ممكن تشوف فيديو لأحمد الزغبي عن الموضوع ده بس مش فاكر عنوانه ايه;
• الكلام اللي فوق اغلبه ينطبق علىالاجواء في برونزويك واللي اعتقد مش هتفرق كتير عن باقي ولايات كندا

الكلام اللي فوق من واقع البحث اللي عملته على الانترنت ومن خلال نصايح وارشادات الناس اللي سبقونا ومن جروبات whats app، اكيد الواقع هيكون مختلف واكيد كل واحد تجربته بتكون مختلفة عن التاني بس احنا ممكن نستخدم المعلومات دي عشان create our own style

دمت في رعاية الله وحفظه ... أخوكم المهاجر 💓

مهنة المحاسب في كندا

السلام على أحلى صحبة واجمل ناس ✋

طيب النهاردة هنتكلم على موضوع شيق جداً بالنسبة ليا وأعتقد لأي محاسب مهاجر كندا. الموضوع ده مش واخد حقه أوي ومش قادر أحدد السبب الرئيسي وراء ده، هل هو بسبب أن عدد المحاسبين المهاجرين لكندا قليل..؟ هل هو بسبب أن محدش بيكلم كتير من المحاسبين اللي هاجرو وخاصةً باللغة العربية..؟ حقيقي أكاد أجزم اني ملقتش أي حد بيكلم عن الموضوع بالعربي وعشان كده قلت خليني اتكلم عنه النهاردة بشكل عام عن career path للمحاسبين في كندا.

طيب، مهنة المحاسب في كندا هي من المهن اللي ليها متطلبات خاصة (نظامية) - عشان ترتقي فيها الى مستويات عليا regulated profession. مش معنى كده انك كمحاسب مش هتقدر تشتغل في كندا في المجال من غير ما تحصل على شهادات معينة بس اذا حبيبت توصل لمناصب ادارية عليا في المجال لازم تكون certified accountant.

طيب ايه هي الشهادات اللي ممكن انك كمحاسب تاخدها:

1.    محاسب قانوني - (Chartered Accountant (CA

       ودي شهادة دولية ومعروفة على مستوى العالم، عشان تبقى محاسب قانوني في كندا ده بيتطلب منك الاتي;

• تكون حاصل على درجة البكارليوس في المحاسبة (ودي أعتقد سهلة وكلنا معانا);
• ثلاث سنوات خبرة في مكتب محاسبة ومراجعة كندي (وده مش موجود معانا فلازم تبدأ بالبحث عن عمل في أحد المكاتب دي اذا كنت حابب تحصل على اللقب ده);
• الانتهاء من دراسة 4 وحدات تعليمية (Four Modules in Accounting);
• أخر حاجة بعد ما بتكمل الثلاث سنين الخبرة المطلوبة بيكون عندك امتحان لمدة 3 أيام (بيكون امتحان صعب مش سهل 💪) ويعرف بأسم التقييم النها ئي  (Uniform Final Evaluation - (UE.

2.   المحاسب العام المعتمد - (Certified General Accountant (CGA

     ومتطلبات الشهادة دي الاتي;

• الحصول على درجة جامعية - أي تخصص مش فارقة معاهم
• الحصول على دورة مدتها سنتين بيكون ليها علاقة بال CGA
• اجتياز امتحان القبول 
• 2-3 سنوات من الخبرة العملية في المحاسبة على المستوى الاداري 

3.   المحاسب الاداري المعتمد -(Certified Management Accountant (CMA

     ومتطلبات الشهادة دي الاتي;

• الحصول على درجة جامعية في تخصص ذو صلة بالمجال - بكارليوس محاسبة
• اجتياز امتحان القبول 
• خبرة عملية في المجال تتراوح من 2-3سنين وتكون فيها بتشتغل بوظيفة ادارية

عايز اقول ان بالنسبة لشهادة المحاسب العام والمحاسب الاداري اختلفت الاراء عن قبولهم لخبراتك بره كندا بس في الاخر هم بردو بيطلبو شهادات الخبرة وبيقيموها وفقاً لمعايير معينة مبنية على الوصف الوظيفي Job Description  والمسؤوليات اللي كنت بيتقوم بيها role and responsibilities.

4.   المحاسب القانوني المحترف - (Chartered Professional Accountant (CPA

   ودي بصراحة اكتر الشهادات واخدة صيت وشهرة في كندا وفي العالم كله، ومتطلبات الشهادة دي كالآتي:

• الحصول على درجة جامعية في تخصص ذو صلة بالمجال - بكارليوس محاسبة
• عمل التقييم المبدئي واللي بيحدد انت هتبدأ من فين بالظبط  

الشهادة دي من أطول الشهادات في دراستها واللي بتترواح من سنتين الى خمس سنين وبتكون بتدرس وبتشتعل طبعاً. تم تصنيفها من أقوى الشهادات واصعبهم على مستوى العالم (مش معنى كده انها مستحيلة أو اني بحبطك) بس لازم تبقى عارف انها مش سهلة محتاجة فلوس كتير ووقت كتير ومزاكرة كتير.

انا ان شاء الله هعمل بوست خاص لل CPA لاني بدأت فيها، هتكلم فيها عن مرحلة التسجيل بالتفصيل وعن خريطة الطريق الخاصة بيها وعن تكلفتها.

5.   شهادات أخرى - Other certificates related to accounting 

     ومن اشهرها مهنة مسك الدفاتر book keeping وهي مهنة مش regulated يعني ممكن أي شخص يشتغلها بدون أي متطلبات خاصة.

المهنة دي حاليا في كندا بيتم الاعتناء بها جداً وتم تطويرها وبقى في معهد ليها  (Professional Bookkeepers of Canada - (PBC  بيمنحك شهادة ماسك دفاتر محترف ومعتمد (Certified Professional Bookkeeper - (CPB في حالة انك بقالك سنتين شغال في المجال داخل كندا واجتياز امتحان القبول طبعاً.

لازم تعرف ان 90% من الناس اللي بيشتغلو مهنة ماسك الدفاتر بياخدو أجرهم بالساعة على عكس المحاسبين. كمان لازم تبقى فاهم انك كأي محاسب في العالم (والمحاسبين فاهمين كلامي ده كويس) بتبدأ صغير وتتمرمط وتذاكر ويطلع عينك بس في النهاية ربنا أكيد بيكرمك وبتحصد ثمرة مجهوداتك دي.

بصراحة انا حاولت كتير ودورت أكتر اني ابدأ اخد كورسات وامتحن قبل ما اسافر بس للاسف الموضوع مش سهل أو انا لسه مش عارف أوصل لحاجة - تواصلت مع معاهد كتير من أصحاب الشهادات المعتمدة والمحترفة وكانت النصيحة الموحدة ليا انك تدرس السوق الكندي وتختار الشهادة اللي هتدعم career path بتاعك وبعدين تبدأ تجهز ورقك وتسجل واذا في اختبارات قبول أو متطلبات معينة تجهزها عشان او ما توصل تبدأ على طول ومش تضيع وقت. 

ده طبعاً غير انك لما بتوصل كندا وتقدم على وظيفة والشركة تلاقي انك بدأت تدرس حاجة وسجلت ده بيدي انطباع كويس جداً عن جديتك ورغبتك في انك تصبح حاجة في السوق الكندي وعن أكيد شغفك بمهنة المحاسبة.

أشوفكم على خير في بوست CPA Canada 👌

ودمتم في رعاية الله وحفظه .. أخوكم المهاجر 💓

محاضرة Planning for Canada

السلام على أحلى صحبة وأجمل ناس ✋

النهاردة هنكلم عن حاجة مهمة جداً جداً جداً لازم كلنا نحضرها ومنكسلش عشان الخطوة دي بجد هتفتحلك افاق تانية خالص وبجد هتأهلك للدخول في سوق العمل الكندي بكل سهولة ويسر ان شاء الله.

بمجرد ما بتستلمو الاميل الذهبي وتجهزو ورقكم وتبعتوه عشان تاخدو الفيزا طبيعي بنبدأ نفكر في الخطوات اللي بعد كده، هنسافر ازاي وهنعمل ايه هناك والمعيشة والتكاليف ...الخ الخ

وعشان تعرف ان الكنديين مش بيهرجو وانهم مجهزينلك كل حاجة، كل اللي عليك تروح على الموقع ده  وتسجل فيه بتختار المقاطعة اللي انت رايحها والمدينة اللي اخترتها في المقاطعة دي بيطلب منك دليل على انك رايح كندا وفي الحالة دي انت بترفق خطاب request letter اللي جالك مع PPR وده كافي بالنسبة ليهم يأكد انك رايح كندا أو على الاقل انك مصرح ليك بدخول كندا.

بتفضل تملا الحاجات اللي بيطلبها منك وكلها عادية جداً مش محتاجة أي اختراعات وبتعمل submit وبيجيلك ايميل ياكد العملية دي ويا دوب يومين هتلاقي حد من Planning for Canada باعتلك ايميل بيشرحلك فيه البرنامج اللي بيقدموه وطريقة عمله واللي هو عبارة عن جزئين، الاول بيكون اسمه GO SESSION وده بيكون الكلام فيه بصفة عامة عن كل شيء في كندا وبتحضره اون لاين مع مجموعة من الناس من بلاد مختلفة بتكون مدته 6 ساعات تقريباً اذا اخترت انك تاخده على يوم واحد أو 3 ساعات كل يوم في حالة انك اخترت تاخده على يومين.

زي ما قلنا ان GO SESSION بيكلم عن كندا بصفة عامة عدد السكان - المقاطعات - الانهار - النظام الضريبي لكل مقاطعة - الطقس على اختلاف المقاطعات - المعيشة وتكلفتها - فرص العمل وأماكن تمركزها - ازاي تبني شبكة علاقات تساعدك في ايجاد فرص عمل سريعة، وأهم حاجة كانو مركزين عليها التحضير - كان في واحدة فرنسية من المحاضرين كل شوية تقول الكلمة دي وتاكد عليها وتقولنا يا جماعه اقرأو كتير وحضرو نفسكم كويس أوي لان التحضير قبل الوصول بيوفر وقت كتير وبيخليك تختصر حاجات كتير عشان بتبقى جي عارف انت هتعمل ايه وتمشي أمورك ازاي - يبقى نقول تاني نحضر نفسنا كويس أوي.

المحاضرة التانية ودي بتكون ليك انت وزوجتك واسمها MAP SESSION ودي بيكون الكلام فيها على المقاطعة اللي انت رايحها والمدينة اللي اخترتها، وكمان على مجال شغلك وازاي ممكن تطور من نفسك قبل الوصول الى كندا عشان تندمج بسهولة في سوق العمل. بتسألك فيها الي بتقود المحاضرة عن اهدافك على المدى القصير والمدى الطويل وبتعرف اتجاهاتك وكل ده مش فضول منها كل ده عشان هي هتحطلك MAP تمشي عليها وتوصلك بناس في كندا يبعتولك links ةيبعتولك كورسات في مجال تخصصك وكلها حقيقي حقيقي حاجات مفيدة وفعلاً مش هتلاحق وهتلاقي نفسك بتحصل كمية معلومات وحاجات مفيدة جداً.

من ضمن الناس اللي هيكلموك ACESS CANADA و CAN PREP و ....الخ هيعلموك ازاي تكتب Canadian resume و cover letter  و ازاي تعمل Interview و تقول ايه وتتجنب ايه وكله على أسس علمية وحاجة ممتعة جداً. حقيقي يا جماعة اللي يلتزم بالمنهج اللي الناس دي بتقدمه هيحس بفرق كبير جداً وهيحس بمدى الاضافة اللي بتنضاف ليه ده غير انها بتدي ثقة جميلة بالنفس انك هتروح هناك تنافس على الشغل وتلاقي شغل على طول ان شاء الله.

انا بدأت في البرامج دي بقالي كده شهر تقريباً وما زلت مستمر وان شاء الله هبقى أوافيكم بأي جديد أوصله.

ودمت في رعاية الله وحفظه .. أخوكم المهاجر 💓

PPR - ما بعد

السلا م على أحلى صحبة وأجمل ناس ✋

بعد استلام جوازات السفر وعليها تأشيرة الدخول لكندا لغرض الاقامة الدائمة وحالة الفرحة اللي بتعيشها مع أسرتك لمدة أسبوع تقريباً، تبدأ بقى تفكر في مجموعة من القرارت اللي لازم تاخدها وخطوات لازم تبدأ تشتغل عليها، ودي ممكن ألخصها في النقاط التالية:

اولاً: انتقال دائم/مؤقت

طيب خليني ابدأ بالانتقال المؤقت وهو الاسهل وأغلب الناس اللي أعرفهم واختارو انهم يبدأو بالمؤقت كان ليهم أسبابهم منها انه محتاج يزيد من الادخار اللي عايز ياخده معاه وهو مسافر ومنهم اللي بيكون مرتبط بعقد عمل واذا كسره هيخسر كتير ومنهم اللي بيفضل يروح يزور البلد ويتعرف عليها قبل ما ياخد خطوة الانتقال الدائم (من الاخر وفقاً لظروفك انت بس اللي بتحدد هتعمل ايه) وفي جميع الحالات لازم نخلي بالنا اننا لازم ندخل كندا قبل تاريخ انتهاء التأشيرة الموجوده في جواز السفر وفي حالة انك اخترت المؤقت فده معناه انك لازم ترجع تدخل كندا تاني بعد مغادرتك ليها من السفرية المؤقتة بحد أقصى سنتين ولا بتخسر الاقامة الدائمة.

أما الانتقال الدائم ده معناه انك تستقيل من شغلك الحالي وتصفي جميع أمورك تروح تزرو أهلك وتشبع منهم على قد ما تقدر وتجهز نفسك واسرتك للحياة الجديدة والعالم التاني اللي مستنيكم بكل ما فيه من عادات وتقاليد وثقافات.

ثانياً: حجز تذاكر السفر

بمجرد ما تقرر انتقالك هيكون دائم ولا مؤقت تبدأ تشتغل على حجز تذاكر السفر وطبعاً كل ما تحجز يوم بدري كل ما توفر أكتر - تذاكر كندا غالية وبتزيد بشكل هستيري - طبعاً اذا رايح مؤقت بتحجز ذهاب واياب واذا منتقل دائم بتحجز ذهاب بس.

طريقة الحجز بتكون انك بتفتح على 3-4 مواقع وتبدأ تتابع سعر التذكرة وتشوف افضل ميعاد ليك، خط السير، الوزن المسموح، ومحطات وساعات التوقف.

طيب بالنسبة لمواقع الحجز ممكن تتابع على كل من Sky scanner - Tajawal - Clear Trip - Wego

نخلي بالنا ان المقارنة مش سعر بس يعني مثلاً اذا كنت مسافر دائم فهتكون محتاج للوزن جداً وبالتالي تاخد بالك من عدد الشنط ووزنها لانه مش كل حاجه بتكون واضحة أوي وشركات الطيران ساعات كتير بتلعب على النقطة دي انه يغريك بالسعر ويخدعك في الوزن. نقطة كمان أغلب الرحلات لكندا بتكون ترانزيت في دولة أوروبية فياريت نخلي بالنا انا المطار اللي هنوصل عليه في البلد الاوروبية دي هو نفسه اللي هنغادر منه لان اغلب الدول الاوروبية هتحتاج من سيادتك تأشيرة عشان تخرج من المطار اللي وصلتله وتروح المطار اللي هتغادر منه - بصراحة المواقع اللي فوق دي محترمة وبتكتبلك اذا كان المطار هيتغير ولا لأ وانت بردو تعمل بحث كويس.

نقطة كمان مهمة جداً تخلي بالك كمنها اذا كان عندك ترانزيت داخل كندا - يعني مثلا نازل كيبيك ورايح نوفاسكوتشيا - لازم تدي لنفسك وقت كافي لعمل اجراءات الدخول لكندا لاول مرة ودي بتحصل في أول ميناء انت بتدخل بيه لكندا من خبرات الناس اللي اقدم مني الكل اجتمع على انك بتحتاج في المتوسط 4 ساعات لتخليص اجراءات الدخول للمرة الأولى. يعني اذا هنقول مثلاً انك وصلت كندا الساعة 4 عصراً فتعمل حسابك ان ان الطيارة اللي بعدها تكون 8 -9 مساءاً.

ثالثاً: حجز الفندق أو محل الاقامة ساعة الوصول

دي بردو من الحاجات اللي يفضل تعملها على طول عشان تضمن سعر كويس ومتستناش لاخر لحظة، موقع booking ممتاز اذا كنت حابب تقعد في فندق أو موتيل - أما اذا كنت حابب تاخد شقة مفروشة فطبعاً Air bnb هو الاختيار الأمثل  - كل ما عليك هو تدخل على الموقع وتختار مكان يعجبك وبعدين تكلم صاحب المكان وتفاصل معاه عشان تاخد أفضل سعر.

طبعاً اللي مسافر دائم يفضل ياخد من اسبوعين لشهر في Air bnb عشان هيكون أرخص من الفندق وعشان ميزنقش نفسه في الوقت لغاية ما يلاقي بيت أو شقة يأجرها ويفرشها.

رابعاً: تبدأ تحط لنفسك خطة تمشي عليها بالنسبة لسوق العمل

ودي طبعاً بتكون للناس اللي قرروا انهم يتنقولو للاقامة الدائمة في كندا - نصيحتي ليكم لازم تستغلو كل دقيقة قبل ما تسافرو تحضرو فيها نفسكم وتكونو مهيئين للدخول فوراً لسوق العمل الكندي بمجرد وصولكم - الموضوع مش صعب ومش سهل ناس كتير قريت انهم قدرو يتحصلو على شغل في خلال الاسبوع الاول من وصولهم لكندا وناس تانية قدرت انها تظبط شغل من حتى قبل ما توصل - في منظمات كتير اوي في كندا على مختلف المقاطعات بتكون مدعومة من الحكومة ووظيفتها الاساسية انها تساعدك وتدربك وتهيئك للدخول في سوق العمل الكندي - هيكون في بوست تفصيلي عن الموضوع ده لاني شايف انه من أهم المواضيع اللي لازم يكون ليها اهتمام كبير مننا وتكون حصتها في البحث والاستكشاف كبيرة جداً.

خامساً: دراسة مكان الاقامة اللي اخترته

النقطة دي بردو مهمة جداً، لازم حضرتك تقوم بعمل بحث تفصيلي عن المكان اللي هتنزل فيه ... يعني مثلاً انا مقاطعتي نيوبرونزويك ونازل ان شاء الله في عاصمة المقاطعة دي فبدأت ادرس تفاصيل البلد من حيث تضاريسها وتوزيعها الجغرافي وأماكن السكن فيها الرخيصة والمتوسطة والغالية واختار اللي يناسبني منها وفي حالة وجود أطفال ايه المناطق اللي فيها مدارس كويسة وتكون مناسبة لأولادي وكمان ايه المناطق اللي بيتوافر فيها الخدمات العامة زي المستشفيات والمواصلات (المواصلات العامة مهمة جداً توافرها بجانب محل اقامتك في البداية لان مش هيكون في عربية وهتكون في مشاوير كتير تعملها) كمان لازم تدور على مكان تسكن فيه يكون قريب منه اماكن بتقدر توفرلك نوعية الاكل اللي انت بتفضلها - يعني اذا مسلم هتدور على اماكن بتوفر أكل حلال ... واذا كنت فيجيتريان فتتاكد من قرب محلات الخضار منك وهكذا...

لازم تبقى فاهم وتحاول تخلي محل الاقامة الاولي ده خطة مؤقتة لانه وارد جداً انه يتغير وفقاً للمكان اللي ربنا هيكرمك بشغل فيه ... يعني انا هنزل مثلاً في فريدريكتون بس ده مش معناه اني هستمر فيها لان ممكن جداً الاقي شغل في في مدينة تانية جنبها وبالتالي هنقل محل سكني - عشان كده حاول انك في الاول تأجر شهربشهر وبلاش 3-6 شهور ايجار دول لانه هيبقى لازم من حضرتك انك تلاقي بديل يقعد مكانك او انك هتخسرلك ايجار شهر أو اتنين اذا حبيت تسيب السكن.

سادساً: تفكر ازاي هتحول فلوسك 

هنا بقى في طرق كتير وبدائل أكتر وانت صاحب القرار الأول والأخير، طبعاً انا هساعدك وهنورك بس انت اللي هتقرر في النهاية. حضرتك هتبدأ تبحث وتقرأ عن النظام الكندي البنكي وتفهم ايه هي الحسابات اللي ممكن تفتحها وتتعامل بيها في كندا ومفيش ما يمنع ابداً انك تتواصل مع البنوك اللي هتعجبك وتفهم منهم أكتر وتعرف تفاصيل وتسأل زي ما انت عايز. اسأل اسأل اسأل

بصراحة موضوع البنك ده يطول شرحه وعشان كده خلينا نناقشه في بوست منفصل أفضل.

ملحوظة:

أفضل طريقة تحول بيها فلوسك قبل ماتسافر هي انك تشوف ايه البنوك اللي في كندا اللي ممكن تفتح فيها حساب قبل ما تسافر وتحول عليها فلوسك وبعدين لما توصل بالسلامة تبقى تفعل الحساب ده وتتعامل معاه عادي.

دمتم في رعاية الله وحفظه .. أخوكم المهاجر 💓

PPR - الايميل الذهبي

السلام لأحلى صحبة وأجمل ناس ✋

النهاردة 25 سبتمبر 2018 يوم غيرعادي يوم لا يمكن يتنسي يوم ممكن ترمومتر السعادة فيه عندك يعدي اي حدود  - ممكن تجري .. تتنطط .. ترقص مع افراد عيلتك تحس حقيقي فعلاً انك طاير من الفرحة.

طيب ليه كل الفرحة دي..؟ وازاي حصلت...؟ واتعاملت معاها ازاي...؟ هو ده اللي هنتكلم فيه النهاردة

طيب انا رجعت من شغلي عادي جداً اتغديت وكان عندي تمرين كمان ساعه معرفش ليه فجأة فتحت الموقع بتاع CIC وقلت خليني اشيك وفعلاً كان الاحساس غير طبيعي لقيت ان انا عندي تحديث على البروفايل بتاعي مع دخلت ابص عليه لقيت فيه رسالة جديدة بعنوان “ Request Letter” فتحتها وفعلا مخبيش عليكم قعدت قدامها من 5 – 10 دقايق مش فاهم اي حاجة وكان الكلام مكتوب بالحبر الاسود ومحتاج حد يفكلي الشفرة، ما بين هو ايه ده وما بين يا ترى ده الايميل المنتظر وميت الف سؤال وسؤال. عدت العشر دقايق وبدأت استوعب اللي بيحصل وافهم ايه المطلوب في الرسالة، كتير من الناس اللي مستنية PPR  مش بيبقى عارف هي عاملة ازاي أو شكلها ايه وعشان كده هنكلم عنها باستفاضة في البوست ده.   

الرسالة بتبقى موجهة للمتقدم الرئيسي “Main Applicant” بيقولولك فيها ان طلبك بخصوص الحصول على الاقامة الدائمة في كندا على وشك الاكتمال، وانك لازم تكمل الخطوات التالية في خلال 30 يوم من تاريخ الرسالة دي، وانك اذا غير قادر على استكمال الخطوات دي لاي سبب من الاسباب فلازم تبلغ “ Visa Office” اللي انت تابع ليها فوراً على ايميلهم  -  في حالتي انا كنت مكتب لندن فكان الميل هو: 

LDNIMMIGRATION@international.gc.ca

طيب الخطوات المطلوبة منك بقى دلوقتي كالتالي:

-        الخطوة الأولى: الافصاح عن أي متغييرات

حدوث اي تغيير خاص بيك زي جواز، طلاق، ولادة، وفاة، لاي فرد من اللي كان ضمن الطلب – تغير في الظروف الصحية  - إدانة اي شخص من المتقدمين للهجرة لاي عمل اجرامي – واخيراً وأهمهم بيكون التغير في معلومات الاتصال بيك زي ايميلك، محل سكنك/اقامتك أو رقم تليفونك
المطلوب منك تقوم لاعت ايميل لل “Visa Office”  تحدث فيه التغييرات اللي حصلت ورجاء خاص متكسلش ومتقلقش ما دام التغير ده مش تطور صحي خطير وسجل اجرامي ابعت ومهيمكش، وفي اغلب الحالات مش هيردو عليك بس خليك في المضمون وابعت قول ايه اللي حاصل معاك – كل امورك تمام ومعندكش حاجة يبقى انت كده تمام الخطوة الاولى.

-        الخطوة الثانية: تحديد وثيقة سفرك للحصول على التأشيرة

هنا انت محتاج تحدد اذا كنت محتاج تأشيرة عشان تدخل كندا وفي الحالة دي لازم تبعت جواز سفرك حضرتك والتابعين للسفارة عشان تاخد الفيزا (دي هيتم الحديث عنها باستفاضة في الخطوة الرابعة) – أما اذا حضرتك مش محتاج تأشيرة عشان تدخل كندا فمش بتبعت جوازات السفر وبتكتفي بارسال صورة من الباسبور بس.

-        الخطوة الثالثة: تحضير المستندات

ودي الخطوة اللي فيها الشغل كله، بتحضر الاوراق اللي مفروض تبعتها للسفارة الكندية اللي بيتم توجيهك ليها في الخطوة اللي جايه. الاوراق المطلوبة منك بتكون كالاتي:

>> صورة من “Request Letter”  اللي جتلك مع ايميل PPR  

>> جوازات سفرك انت والتابعين أو صورة منها زي ما وضحنا في الخطوة التانية مرفق معاها جدول بتملاه هو بيكون حاططهولك في الرسالة اللي جتلك بتكتب فيها اسم المتقدم الرئيسي ورقم جواز سفره وتاريخ انتهاء جواز السفر والطول ولون العين واللغة الأم – ومتقولش انا قدمتها قبل كده – معلش قدمها تاني.
>> صورتين شخصيتين ليك ولك فرد من التابعين ميكنش عدا عليها أكتر من 6 شهور – الصورة بيكون ليها مواصفات خاصة واللينك ده من CIC بيوضح المواصفات دي بالظبط: Photo description

ملحوظة: ناس كتير جوازات سفرها بترجع بسبب الصور فياريت نركز ونحاول نختار ستوديو محترم نتصور فيه ونبذل شوية مجهود مش نروح مع أول حاجه تقابلنا وخلاص.

كده احنا خلصنا خطوة تحضير الورق وهننتقل على الخطوة الأخيرة

-        الخطوة الرابعة: خطوة تقديم الأوراق

بعد ما حضرنا الورق زي ما وضحنا في الخطوة التالتة، بنبعت كل الأوراق دي لاقرب سفارة كندية وهو بيبقى محددهالك، بنبعت عن طريق مكتب تساهيل الاقرب ليك VFSوهو بدوره بيبعت للسفارة.

الخطاب اللي بيجيلك بيكون فيه لينك مكتب تساهيل الاقرب ليك بتدوس على اللينك وتتبع الخطوات في الغالب يا أما بتروح تقدم الورق بنفسك وتسلم الباسبورات لما تخلص وتدفع الرسوم يا أما بتعمل طلب على الموقع هم يجولك لمكانك  ياخدو الاوراق ويرجعولك الباسبور وعليه الفيزا وده بيكون مقابل مصاريف شحن اضافية. بالنسبة ليا انا بعتها من مكتب تساهيل جده للرياض ورحت وديت الورق بنفسي واستلمته بنفسي وكانت قيمة المصاريف تقريباً 525 ريال لعدد 4 لأفراد يزيدو او يقلو حاجه بسيطة.

أول مابتقدم الاوراق الموظف بيفلي الاوراق لدرجة اني فاكر انه طلع مسطرة وقاس طول الصور كلها 7 سم وعرض 5 سم وبعدين طلب مني الرسوم وبعدين اداني ايصال عليه tracking number  لكل جواز سفر وقالي تابع خط سير الاوراق على الموقع من الرقم ده. بصراحه أول ما طلعت من المبنى جالي اربع رسايل برقم التتبع لكل جواز سفر – خدمة بصراحة ممتازة شكراً مكتب تساهيل جدة.

بعد 5 أيام عمل بالظبط جالي رسالة وايميل ان جوازات السفر خلصت واتعمل تحديث على الموقع CIC برقم التاشيرة اللي ادقت على الباسبور وصلاحيتها.

بيجيلك ظرف لكل جواز سفر انت قدمته بيكون فيه جواز السفر طبعاً ونسختين من COPR – Confirmation of Permanent Resident

بالاضافة لورقة زيادة بتكون في ظرف المتقدم الرئيسي بيكون فيها زي مقدمة عن المرحلة اللي جايه وبداية تجهيزك للسفر لبلدك كندا وبعض المواقع واللينك اللي هتدعم فهمك للمرحلة اللي جاية واللي هكلمكم عنها بالتفصيل المملل في المرحلة اللي جاية.

      

بعض الدروس المستفادة:

1-  متستناش لاخر لحظة عشان تجدد جوازات السفر لان أول ما بيجيلك ايميل PPR  تاريخ صلاحية التأشيرة بيكون اتحدد واللي هو بيكون يا اما تاريخ نهاية الكشف الطبي او تاريخ انتهاء صلاحية اي من جوازات السفر سواء للمقيمين أو التابعين أيهما أقرب ولامثال على ده انا تاريخ الكشف الطبي كان ابريل وتاريخ انتهاء جواز سفر ابني كان فبراير، لما جالنا PPR عملت ناصح ورحت جددتوا بس للاسف جالي صلاحية التأشيرة لغاية فبراير على الرغم اني قدمت الباسبور الجديد وفعلاً غيرو رقم التأشيرة بالجواز الجديد بس الصلاحية فضلت زي ما هي وخسرت شهرين – طبعاً خسارتي في الوقت مش كبيرة بس حبيت انوه لانه ممكن تضر جامد اذا كانت الفترة الزمنية 4-6 شهور فخلي بالكم يا جماعه.

2-  الصور الصور يا جماعه – انا شفت ناس كتير ورقها رجع ودخلت في تأخيرات وحوارات ملهاش لازمة فبا ريت نتحرى ستوديو كويس ن google ونشوف الناس بترشح مين كويس تم تجربته في المنطقة اللي حضرتك مقيم فيها – ده غير اول ما تدخل على الراجل اللي بيصور لازم تحس انه فاهم بمجرد ما تقوله صور لكندا تلاقيه بيتجاوب معاك وبيقولك تعمل ايه.

3-  بعد ما تستلم الاظرف من الموظفة في تساهيل متسبش المكان الا لما تفتح جميع الاظرف وتراجع البيانات كويس اوي رقم الباسبور وتاريخ الميلاد وكتابة الاسماء وكل حرف ورقم في التأشيرة وال COPR

4-  طبعاً متنساش تبعت صورة التأشيرة لمراتك على الواتس أب عشان تفرحها وتستناك تحتفلو وتفرحو سوا – ربنا يجعل كل ايامكم فرح وسعاده ودمتم بخير.

New Brunswick فكرة الهجرة - بدايتي مع

السلام لأحلى صحبة وأجمل ناس ✋

هنا أنا هتكلم ازاي جت فكرة الهجرة وازاي بدأت وازاي اتحولت الفكرة الى هدف.

في أواخر شتاء 2013 كنا قاعدين مع بعض الاصدقاء اللي كانوا مقتنعين جداً ان الهجرة عموما لازم تكون غير شرعية وان الهجرة لكندا بالذات صعبه جدا ومحتاجه فلوس كتير –  يوميها قعدو يكلموني كتير عن الهجرة، والهجرة اللى كندا على وجه الخصوص وان ازاي المهنة بتاعتي مطلوبة هناك وان ازاي البلد دي ساحرة في طبيعتها وناسها وتلجها.

وقتها لا اراديا لقيت نفسي بفكر ازاي اهاجر لكندا هجرة شرعية، بس كان مجرد تفكير مدخلش حيز التنفيذ

بعد سنه تقريبا في اواخر 2014 رجعت الفكرة تاني بقوة خصوصاً أن الأوضاع كانت بتزداد سوءاً في مصر ودول الخليج كمان، بس  كان لازم نستنى لأن نظام الهجرة الكندي وقتها كان هيتغير في يناير 2015 لنظام جديد اسمه الاكسبرس انتري بعد ما كان النظام المتبع هو ورقي فيدرالي.

وقتها مكنش في غير منتدى المطاريد كمرجع لأنه اكتر مكان بيشرح النظام الجديد ووقتها كان أغلب الموضوعات عبارة عن تكهنات بس كانت مفيدة جداً، مع فتح النظام الإلكتروني الجديد بقى موضوع الهجرة أسهل في التقديم وبدأنا فعلاً نحضر أوراقنا

مجموع نقاطنا وقتها كان قليل وكان لازم ندور على ترشيح مقاطعة أو عقد عمل الي كان مستحيل الحصول عليهم.

أغلب شروط المقاطعات الكبيرة زي اونتاريو، ألبرتا وبريتش كولومبيا صعبة وبتطلب دراسة في كندا أو معارف داخل المقاطعة وده مكنش متوافر عندنا -  نقلنا البحث للمقاطعات الصغيرة وكانت نوفاسكوتشيا "Nova Scotia" هي الإختيار، وقتها تواصلنا مع محامية هجرة داخل كندا عرفناها عن طريق صديق ومع إن تكاليفها كانت عالية إلا إنها كانت خيار مناسب وقتها،  وبدأنا في منتصف 2015 بالتحضير لإمتحان اللغة الانجليزية  (IELTS) – لان حضرتك عشان تقدر تفتح ملف على موقع الهجرة “CIC” لازم تكون محقق الحد الادنى في امتحان اللغة واللي هي 6 في اربع امتحانات (المحادثة – الكتابة – القراءة - الاستماع) وطبعاً كل ما درجاتك تعلى كل ما نقاطك تعلى اكتر وبالتالي موقفك في انك تترشح للهجرة يبقى أقوى – أن شاء الله هيكون فيه مقالة تانية تفصيلية عن امتحان اللغة وازاي تذاكر والمواقع اللي ممكن تفيدك وكل ده بدراسة ذاتية ودون الحاجه الى أي كورسات.

الحمد لله يوم 15 نوفمبر 2015 امتحنت وعديت وجبت السكور المطلوب وفي نفس الوقت المدام كمان امتحنت لان درجاتها مهما كانت قليلة بتاخد عليها نقاط اضافية ضمن حاجة يطلق عليها "القدرة على التأقلم"

وبعد كده الخطوة التانية بعد امتحان اللغة اني قدمت ورق تقييم شهادتي لل "WES" World Education Services  وده عبارة عن منظمة معتمدة في كل من الولايات المتحدة الأمريكية وكندا بتعبت سيادتك عليها شهادتك/شهاداتك العلمية وبيان بالدرجات وهم بيقيمو الشهادات وفقاً للنظام التعليمي في كندا ويمنحوك الدرجة العلمية المعادلة ليها.

كل ما عليك هو انك بتدخل على الموقع بتاعهم وتنشأ حساب ليك وبعدين بتطلب منه انك عايز تقيم شهاداتك وذلك لغرض الهجرة وهو بيقولك تعمل ايه بالتفصيل، كل اللي عليك انك تتبع التعليمات ومش هتلاقي اي صعوبة في الموضوع.

التكلفة تقريبا وقتها كانت على ما اذكر 240 دولار كندي تقييم شهادتي والورق والتوثيقات في الجامعة كانت في حدود 1500 جنيه مصري شاملة تكلفة ارسال الطرد. انا ساعتها مكنتش في مصر وربنا يكرمها اخت مراتي هي اللي قامت بالمهمة كلها كأني كنت موجود وأكتر.

وفي نفس الوقت بدأت اشتغل على شهادات خبرتي طبقاً للمتطلبات الكندية – ان شاء الله هبقى اعمل مقالة منفصلة خاصة بشكل شهادات الخبرة وطريقة عملها.

كل ده وانا لسه مفتحتش ملف أكسبرس إنتري لان صلاحية الملف سنه وكنت محتاج وقت أحضر الورق وكان قرار تأجيل فتح الملف لحد ما أخلص الورق قرار سليم، اخدنا حوالي 6 شهور ما بين إمتحان الأيلتس وتحضير الأوراق لحد ما في يوم الدنيا كلها اتغيرت تماما.

البداية الفعليه:

كنت لسه راجع من إجازتي السنوية في مصر مكملتش يومين، لقيت بوست في جروب على الفيسبوك اسمه الهجرة لنيوزلاندا وكندا واستراليا، البوست ده عبارة عن شخص -لا اذكر إسمه للأسف- منزعج جداااااا من المصريين كلهم لأنه حضر محاضرة لمقاطعه إسمها نيوبرونزويك في أبوظبي وكان أغلب الحضور من الهند والفلبين وأن المصريين و العرب عموما كانوا قلة، وأن لسه  المقاطعه دي هتعمل محاضرتين كمان واحدة في القاهرة وواحدة في الأسكندرية

المحاضرة دي اذا حضرتها وورقك جاهز ممكن تاخد  ITA - Invitation To Apply دعوة من المقاطعة أنك تقدم ورقك ليها عشان تديلك ترشيح تقدر تاخد بيه 600 نقطة وتدخل سحب وزارة الهجرة الكندية مباشرة

وحضور المحاضرة دي شرط من شروط التقديم للمقاطعة متقدرش تقدم للترشيح من غيره، وعشان تعرف تحضر المحاضرة دي لازم تكون مقيم شرعي في البلد المقام فيها المحاضرة أو انها بلد جنسيتك

وعشان وقتها لسه راجع من اجازتي في مصر كان الموضوع صعب اني انزل تاني،وفعلا اخدت المجازفة، وقلت هقدم لحضور محاضرة القاهرة وإذا ملقتش مكان هقدم لمحاضرة الإسكندرية، قدمت لمحاضرة القاهرة والحمد لله لقيت مكان وحجزت تذكرة طيران ليوم واحد (13 ساعة بالظبط).

التحدي بقى وقتها اننا نحاول نعرف المقاطعة دي لاننا تقريبا كانت اول مرة نسمع عنها، دخلنا على خريطة كندا تاني لقيت إنها قريب جدا من نوفاسكوتشيا “Nova Scotia”على حدودها تقريبا وانها من ضمن مقاطعات الأطلنطي، والخطوة التانية اني افتح ملف اكسبرس انتري.

  

يوم المحاضرة:

راحت عليا نومه وصحيت متأخر، والحمد لله إني كنت محضر أوراقي من بليل  جريت على المطار والحمد لله لحقت الطيارة.

 المحاضرة  كانت في فندق راديسون بلو - القاهرة جنب المطار، وصلت الحمد لله في معادي وكانو بياخدو اسامينا على بوابة القاعة وكان المشرف على المحاضرة ورئيس البعثة في مصر هو أستاذ أشرف غانم وكانت المحاضرة تعريفية عن المقاطعة وكل ما يخصها من نظام تعليم  ونظام صحي ووظايف وغيرها وبعد المحاضرة بدأوا يستقبلوا الاوراق ويسلموا المتقدمين دعوة التقديم للمقاطعه.

والناس الي جت وورقها مكنش جاهز تم اعطائهم إثبات انهم قد قامو بحضور المحاضرة وبمجرد قيامهم بتجهيز الأوراق المطلوبة ما عليهم الا ان يرسلو الى المقاطعة وهم هيدوهم Invitation to Apply  على طول ومن غير أي طلبات تانية.

طلبت منهم اني اقدم ورقي في الأول لان عندي طيارة لازم الحقها، وكانوا متعاونين جدا وبعد ما قدمت الورق ونزلت من الفندق اكتشفت اني كاتب النوك الخاص بالوظيفة بتاعتي في الورق غلط 🙉، اضطريت ارجع عشان اصححه وللمرة الثانية كانوا اكثر من متعاونين وسهلوا عليا الموضوع جداً ومشيت عشان الحق الطيارة – شكر خاص لكل الناس اللي كانو في المحاضرة دي لأنهم وقتها تفهمو موقفي وسمحولي اتجاوزهم عشان الحق طيارتي.

اكتر كلمة مش قادر انساها لما كنت بقدم الورق للسيد اشرف غانم وراجع معايا كل حاجه سلم عليا وانا ماشي وقالي:

 
"See you in Brunswick"