السلا م على أحلى صحبة وأجمل ناس ✋
بعد استلام جوازات السفر وعليها تأشيرة الدخول لكندا لغرض الاقامة الدائمة وحالة الفرحة اللي بتعيشها مع أسرتك لمدة أسبوع تقريباً، تبدأ بقى تفكر في مجموعة من القرارت اللي لازم تاخدها وخطوات لازم تبدأ تشتغل عليها، ودي ممكن ألخصها في النقاط التالية:
اولاً: انتقال دائم/مؤقت
طيب خليني ابدأ بالانتقال المؤقت وهو الاسهل وأغلب الناس اللي أعرفهم واختارو انهم يبدأو بالمؤقت كان ليهم أسبابهم منها انه محتاج يزيد من الادخار اللي عايز ياخده معاه وهو مسافر ومنهم اللي بيكون مرتبط بعقد عمل واذا كسره هيخسر كتير ومنهم اللي بيفضل يروح يزور البلد ويتعرف عليها قبل ما ياخد خطوة الانتقال الدائم (من الاخر وفقاً لظروفك انت بس اللي بتحدد هتعمل ايه) وفي جميع الحالات لازم نخلي بالنا اننا لازم ندخل كندا قبل تاريخ انتهاء التأشيرة الموجوده في جواز السفر وفي حالة انك اخترت المؤقت فده معناه انك لازم ترجع تدخل كندا تاني بعد مغادرتك ليها من السفرية المؤقتة بحد أقصى سنتين ولا بتخسر الاقامة الدائمة.
أما الانتقال الدائم ده معناه انك تستقيل من شغلك الحالي وتصفي جميع أمورك تروح تزرو أهلك وتشبع منهم على قد ما تقدر وتجهز نفسك واسرتك للحياة الجديدة والعالم التاني اللي مستنيكم بكل ما فيه من عادات وتقاليد وثقافات.
ثانياً: حجز تذاكر السفر
بمجرد ما تقرر انتقالك هيكون دائم ولا مؤقت تبدأ تشتغل على حجز تذاكر السفر وطبعاً كل ما تحجز يوم بدري كل ما توفر أكتر - تذاكر كندا غالية وبتزيد بشكل هستيري - طبعاً اذا رايح مؤقت بتحجز ذهاب واياب واذا منتقل دائم بتحجز ذهاب بس.
طريقة الحجز بتكون انك بتفتح على 3-4 مواقع وتبدأ تتابع سعر التذكرة وتشوف افضل ميعاد ليك، خط السير، الوزن المسموح، ومحطات وساعات التوقف.
طيب بالنسبة لمواقع الحجز ممكن تتابع على كل من Sky scanner - Tajawal - Clear Trip - Wego
نخلي بالنا ان المقارنة مش سعر بس يعني مثلاً اذا كنت مسافر دائم فهتكون محتاج للوزن جداً وبالتالي تاخد بالك من عدد الشنط ووزنها لانه مش كل حاجه بتكون واضحة أوي وشركات الطيران ساعات كتير بتلعب على النقطة دي انه يغريك بالسعر ويخدعك في الوزن. نقطة كمان أغلب الرحلات لكندا بتكون ترانزيت في دولة أوروبية فياريت نخلي بالنا انا المطار اللي هنوصل عليه في البلد الاوروبية دي هو نفسه اللي هنغادر منه لان اغلب الدول الاوروبية هتحتاج من سيادتك تأشيرة عشان تخرج من المطار اللي وصلتله وتروح المطار اللي هتغادر منه - بصراحة المواقع اللي فوق دي محترمة وبتكتبلك اذا كان المطار هيتغير ولا لأ وانت بردو تعمل بحث كويس.
نقطة كمان مهمة جداً تخلي بالك كمنها اذا كان عندك ترانزيت داخل كندا - يعني مثلا نازل كيبيك ورايح نوفاسكوتشيا - لازم تدي لنفسك وقت كافي لعمل اجراءات الدخول لكندا لاول مرة ودي بتحصل في أول ميناء انت بتدخل بيه لكندا من خبرات الناس اللي اقدم مني الكل اجتمع على انك بتحتاج في المتوسط 4 ساعات لتخليص اجراءات الدخول للمرة الأولى. يعني اذا هنقول مثلاً انك وصلت كندا الساعة 4 عصراً فتعمل حسابك ان ان الطيارة اللي بعدها تكون 8 -9 مساءاً.
ثالثاً: حجز الفندق أو محل الاقامة ساعة الوصول
دي بردو من الحاجات اللي يفضل تعملها على طول عشان تضمن سعر كويس ومتستناش لاخر لحظة، موقع booking ممتاز اذا كنت حابب تقعد في فندق أو موتيل - أما اذا كنت حابب تاخد شقة مفروشة فطبعاً Air bnb هو الاختيار الأمثل - كل ما عليك هو تدخل على الموقع وتختار مكان يعجبك وبعدين تكلم صاحب المكان وتفاصل معاه عشان تاخد أفضل سعر.
طبعاً اللي مسافر دائم يفضل ياخد من اسبوعين لشهر في Air bnb عشان هيكون أرخص من الفندق وعشان ميزنقش نفسه في الوقت لغاية ما يلاقي بيت أو شقة يأجرها ويفرشها.
رابعاً: تبدأ تحط لنفسك خطة تمشي عليها بالنسبة لسوق العمل
ودي طبعاً بتكون للناس اللي قرروا انهم يتنقولو للاقامة الدائمة في كندا - نصيحتي ليكم لازم تستغلو كل دقيقة قبل ما تسافرو تحضرو فيها نفسكم وتكونو مهيئين للدخول فوراً لسوق العمل الكندي بمجرد وصولكم - الموضوع مش صعب ومش سهل ناس كتير قريت انهم قدرو يتحصلو على شغل في خلال الاسبوع الاول من وصولهم لكندا وناس تانية قدرت انها تظبط شغل من حتى قبل ما توصل - في منظمات كتير اوي في كندا على مختلف المقاطعات بتكون مدعومة من الحكومة ووظيفتها الاساسية انها تساعدك وتدربك وتهيئك للدخول في سوق العمل الكندي - هيكون في بوست تفصيلي عن الموضوع ده لاني شايف انه من أهم المواضيع اللي لازم يكون ليها اهتمام كبير مننا وتكون حصتها في البحث والاستكشاف كبيرة جداً.
خامساً: دراسة مكان الاقامة اللي اخترته
النقطة دي بردو مهمة جداً، لازم حضرتك تقوم بعمل بحث تفصيلي عن المكان اللي هتنزل فيه ... يعني مثلاً انا مقاطعتي نيوبرونزويك ونازل ان شاء الله في عاصمة المقاطعة دي فبدأت ادرس تفاصيل البلد من حيث تضاريسها وتوزيعها الجغرافي وأماكن السكن فيها الرخيصة والمتوسطة والغالية واختار اللي يناسبني منها وفي حالة وجود أطفال ايه المناطق اللي فيها مدارس كويسة وتكون مناسبة لأولادي وكمان ايه المناطق اللي بيتوافر فيها الخدمات العامة زي المستشفيات والمواصلات (المواصلات العامة مهمة جداً توافرها بجانب محل اقامتك في البداية لان مش هيكون في عربية وهتكون في مشاوير كتير تعملها) كمان لازم تدور على مكان تسكن فيه يكون قريب منه اماكن بتقدر توفرلك نوعية الاكل اللي انت بتفضلها - يعني اذا مسلم هتدور على اماكن بتوفر أكل حلال ... واذا كنت فيجيتريان فتتاكد من قرب محلات الخضار منك وهكذا...
لازم تبقى فاهم وتحاول تخلي محل الاقامة الاولي ده خطة مؤقتة لانه وارد جداً انه يتغير وفقاً للمكان اللي ربنا هيكرمك بشغل فيه ... يعني انا هنزل مثلاً في فريدريكتون بس ده مش معناه اني هستمر فيها لان ممكن جداً الاقي شغل في في مدينة تانية جنبها وبالتالي هنقل محل سكني - عشان كده حاول انك في الاول تأجر شهربشهر وبلاش 3-6 شهور ايجار دول لانه هيبقى لازم من حضرتك انك تلاقي بديل يقعد مكانك او انك هتخسرلك ايجار شهر أو اتنين اذا حبيت تسيب السكن.
سادساً: تفكر ازاي هتحول فلوسك
هنا بقى في طرق كتير وبدائل أكتر وانت صاحب القرار الأول والأخير، طبعاً انا هساعدك وهنورك بس انت اللي هتقرر في النهاية. حضرتك هتبدأ تبحث وتقرأ عن النظام الكندي البنكي وتفهم ايه هي الحسابات اللي ممكن تفتحها وتتعامل بيها في كندا ومفيش ما يمنع ابداً انك تتواصل مع البنوك اللي هتعجبك وتفهم منهم أكتر وتعرف تفاصيل وتسأل زي ما انت عايز. اسأل اسأل اسأل
بصراحة موضوع البنك ده يطول شرحه وعشان كده خلينا نناقشه في بوست منفصل أفضل.
ملحوظة:
أفضل طريقة تحول بيها فلوسك قبل ماتسافر هي انك تشوف ايه البنوك اللي في كندا اللي ممكن تفتح فيها حساب قبل ما تسافر وتحول عليها فلوسك وبعدين لما توصل بالسلامة تبقى تفعل الحساب ده وتتعامل معاه عادي.
دمتم في رعاية الله وحفظه .. أخوكم المهاجر 💓
دمتم في رعاية الله وحفظه .. أخوكم المهاجر 💓
